Plantun de Prouvènço

Pèr coumpara dos planto d'encò nostre

Mutellina adonidifolia & Orchis mascula

Mutellina adonidifolia

Apiaceae Umbelliferae

Nom en français : Ligustique à feuilles d'adonis.

Descripcioun :
La mutellino es uno planto renadivo, sènso péu que trachis dins li pelouso, champino e coumbo à nèu séusouso, dins l'uba dis Aup. Es uno planto raro au nostre. Se recounèis à sa cambo boutisso e subretout à si fueio tres cop descoupado en long que fan un pau pensa à li dóu Seseli montanum. Apoundèn que li brout an ges de bratèio (mai pas lis invoulucello).

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 40 cm
Fueio : coumpausado
Tipe bioulougico : Emicriptoufite
Cicle bioulougico : Planto renadivo

Gènre : Mutellina
Famiho : Apiaceae
Famiho classico : Umbelliferae

Ordre : Apiales

Coulour de la flour : Blanco
Petalo : 5
Ø (o loungour) enflourejado : 3 à 5 cm
Flourido : Estiéu

Sòu : Si
Autour basso e auto : 1500 à 2800 m
Aparado : Noun
Juliet à avoust

Liò : Pelouso - Champino - Coumbo à nèu
Estànci : Subaupen à Aupen
Couroulougi : Ouroufito-Éuroupenco
Ref. sc. : Mutellina adonidifolia (J.Gay) Gutermann, 2006 (= Meum mutellina (L.) Gaertn., 1788 = Ligusticum mutellina (L.) Crantz, 1768 )

Erbo-de-la-Pandecousto

Orchis mascula

Orchidaceae

Autre noum : Coulos-de-gat.

Noms en français : Orchis mâle, Satyrion mâle.

Descripcioun :
L'erbo-de-la-Pandecousto trachis dins li bos clar e li prado dins li relarg un pau umide ; se vèi pas dins li garrigo prouvençalo ounte s'atrobo soun cousin, la damisello, Orchis olbiensis. Se recounèis à sa labreto di tres partido e à soun esperoun un pau pu long.

Usanço :
Se sèmblo pas èstre utilisa au nostre, li cabosso soun emplegado en Turquìo e au Proche-Óurient pèr adouba, emé d'aigo e de sucre, lou salep, bevendo au goust de vaniho contro lou mau de garganto e la fatigo. La planto èi dicho peréu acalouranto (principe di signaturo). Ramenten que "orchis" en grè (Théophraste -372 -287) vòu dire roubignòli en raport emé li dos cabosso.